Pages

Tuesday, September 27, 2011

مئة مثل لبناني... وكم واحد حبة مسك

إشتهر اللبنانيون (وأهل المشرق العربي عموماً) بكثرة تندرهم و استعمالهم للأمثال و المقولات في كلامهم.  قلة من الناس لا تستعمل الأمثال عند اثبات وجهة نظر أو عند النقاش (وما ابرع اللبنانيين فيه)..
احببت ان أتذكر بعضا من امثال التي اعرفها واستعملها عادة لأسردها عليكم.. فتوقفت عند مئة مثل - وأكثر شوي - لأن هنالك الالاف من الأمثال وما منعود نخلص صراحة.. 



شعراء الزجل اللبناني زين شعب وزغلول الدامور  - ليس في الإطار: صحن التبولة

جيران
1. الجار قبل الدار 
2. الجار للجار لو الزمن جار
3. الله وصى بسابع جار
4. جارك القريب ولا خيك البعيد

مصاري
5. عصفور بالإيد ولا عشرة عالشجرة 
6. خبي قرشك الابيض ليومك الأسود
7. هين فلوسك ولا تهين نفوسك 
8. عا قد بساطك مد إجريك
9. البحصة بتسند خابية
10. حافظ عاقديمك جديدك مابيدوم

رجال ونسوان
11. حط إيدك بجنازة ولا تحط يدك بجوازة 
12. يا داخل بين البصلة وقشرتها لا ينوبك إلا ريحتها
13. قال يا مأمنة للرجال يا مأمنة للمي بالغربال 
14. المرا متل السجادة كل مادعست عليها بتجوهر 
15. الكذب ملح الرجال
16. الرجال بلا كرش متل البيت بلا فرش 
17. الرجال بلا كرش مابيسوى قرش 
18. الرجال بالبيت رحمة حتى لو جاب فحمة 

أولاد
19. الولد ولد لو حكم بلد 
20. الولد لو بار بيطلع تلتينو للخال
21. الابن العاطل بيجيب لاهلو المسبة 
22. إن كبر ابنك خاويه
23. ان طلعت دقن ابنك حلوق دقنك
24. القرد بعين إمو غزال

أكل
25. الفول مسامير الركب
26. مفتاح البطن لقمة
27. كول أكل الجمال وقوم قبل الرجال
28. طعمي البطن بتستحي العين  

عالم الحيوان
29. دنب الكلب بيضل اعوج لو حطوه 100 سنة بالقالب
30. الكلب اللي بـعوي مابيعض
31. الجنازة حامية والميت كلب
32. حد العقرب لا تقرب وحد الحية فروش ونام
33. ذكور الديب وهيي القضيب
34. ذكور القط دغري بـينط
35. غاب القط العب يا فار
36. بيلهي الدب عن عليقو
37. حدا بيجيب الدب عاكرمو؟
38. فتح عا حالو وكر دبابير 

نصائح
39. النصيحة بجمل
40. يللي بيجرب المجّرب بيكون عقلو مخّرب
41. سأل مجرب وما تسأل حكيم
42. بس يكتروا الطباخين بتشوط الطبخة
43. الصبر مفتاح الفرج
44. الباب اللي بيجيك منو ريح سدو واستريح
45. بعود عن الشر وغنيلو
46. لا تنام بين القبور ولا تشوف منامات وحشة
47. اللي بدو الدح بدو يقول أح
48. ماتقول فول ليصير بالمكيول
49. أعط خبزك للخباز لو بدو ياكل نصو
50. الإيد اللي مافيك ليها بوسها وإدعي عليها بالكسر
51. اللي بياكل عاضرسو بينفع نفسو
52. شرايتو ولا تربيتو 
53. اللي أولو شرط  آخرو سلامة
54. ما متت ما شفت من مات؟

نشرة الطقس
55. ايلول طرفو بالشتي مبلول
56. شباط اللبّاط
57. شباط ما إلو رباط
58. بين تشرين و تشرين صيف تاني
59. آب اللهاب

اييه دنيا
60. قال صار للدبانة دكانة وصارت تسكر عا بكير
61. قال صار لل... مرا وصار يحلف بالطلاق
62. علمناه عالشحادة سبقنا عالبواب 
63. شو بدي اتذكر منك يا سفرجل كل عضة بغصة
64. قلو ليش عم تنفخ باللبن؟ قلو كاويني الحليب 
65. جبنا الاقرع ليشجعنا كشف عالقرعة وفزعنا
66. احترنا يا قرعة من وين بدنا نبوسك

غير قصص
67. لو بعدها تشتي كانت غيمت
68. ما في دخان بلا نار
69. اللي الو عمر ما بتقتلو شدة
70. اللي استحوا ماتوا 
71. الشاطر ما بيموت
72. غلطة الشاطر بالف 
73. من العب للجيبة 
74. بياخدك عالبحر بـرجعك عطشان 
75. إجا ليكحلها عماها 
76. ما وصلت فرحتنا لقرعتنا 
77. ما وصلت اللقمة للتم 
78. كل ما دق الكوز بالجرة
79. طب الجرة عاتمها بتطلع البنت لأمها
80. مش كل مرة بتسلم الجرة
81. قال يللي متلنا تعو لعنا
82. على شكلو شكشكلو
83. أنا وخيي عا ابن عمي وأنا وابن عمي عالغريب
84. وجو بيقطع الخميرة من البيت
85. وجو مابيضحك للرغيف السخن
86. واحد مربى دقنه والتاني تعبان فيها
87. وصلت الموس للدقن
88. وصل الدم للركب 
89. كل ديك عا مزبلتو صياح
90. الصهر سند الضهر
91. مين ماتجوز امي صرت قلو عمي 
92. اللي ما عندو كبير يشتري كبير
93. كرمال عين تكرم مرجعيون
94. المصلح الو تلتين القتلة 
95. طويل وهبيل
96. طول بلا غلة
97. طلطميس مابيعرف الجمعة من الخميس
98. العقل زينة والهبل بالدزينة
99. السكافي حافي والحايك عريان 
100.  باب النجار مخلع 

بونوس.. ما في بيناتنا
101.  صيت غنى ولا صيت فقر
102. اللي في تحت باطو مسلة بنتعرو
103.القرايب عقارب
104.بحكيكي يا جارة لتسمعي يا كنة
105.ماصرلو بالقصر من امبارح العصر
106.العتب عا قد المحبة
107.الفاجر بياكل مال التاجر
108.بالوجّ مراية وبالقفا صرماية
109.حكي بدري وانشرح صدري
110.بعد الكبرة جبّة حمرا
111.الشيبة هيبة
112. ألف كلمة جبان و لا كلمة الله يرحمو
113. إللي بيعوز الكلب بيقول له صبحَك بالخير يا سيدنا
114. بيغرق بشبر ميّ
115. من تحت الدلفة لتحت المزراب








0 comments:

Post a Comment