أبشع شي

أبشع شي بس تكون قانع حالك إنك مبسوط وإنت عرفان من جوا إنك مش مبسوط
بس تجرب تنبسط وما تقدر
والأبشع بس تلاقي كل العالم مستكترة عليك إنك تنبسط
 أبشع شي لما تضحك وتنتبه بعدين إنو هاي أول مرة بتضحك من كل قلبك من زمان كتير
بس تشتاق لحالك
بس تحس وقتك مش الك 

أبشع شي بس تطلع بأهلك تلاقيهن كبروا وصاروا هني اللي يتحامو فيك 

بس تعرف انو على الأرجح ما رح تشتري الفيراري ولا تبرم العالم لأنو في كتير اشيا ابدى لازم تعملها
أبشع شي بس تطلع تلاقي ما طلعلك من الدنيا الا صديق واحد ان كترت
وبس تفكر كم إنسان فكرته خيك باعك بقشرة بصلة بس بطل عايزك 

أبشع شي بس تكون ناطر بفارغ الصبر تشوف حدا وبالآخر تتأخر بالشغل

بس تغلط مع الشخص اللي بتحبو ويقلك انو ماشي الحال وتنيناتكن عرفانين أنو مش رح ينسالك الغلطة كل حياتو
وبس تشوف الشخص اللي بتحبو عم يبكي وما تقدر تعملو شي
وبس تشوفو عم يبكي وما يقلك ليش
أبشع شي بس تضطر تقنع حدا انو معك حق بشغلة وإنت عرفان إنو الحق معو الو

والأبشع من هيك بس تضطر تقلو إنه الحق معه لانه اقوى منك
بس العالم تزقفلك وانت عرفان إنك ما بتستاهل
أبشع شي بس ماتعرف ليه عم تعمل كل شي عم تعملو
وبس تكون ماعرفت عأساس شو قررت كيف حياتك ماشية
بس تبلش تسأل حالك يا ترى بعد فيي ارجع غير كل شي؟ طب بركي هيك أحسن؟